Debedavan

Debedavan is a village in Tavush region of Armenia. Population is about 700.

Դեբեդավան. ամենացածրադիր գոտու հողը և մարդիկ

7 մայիս, 2020 11:58

Դեբեդավան գյուղը գտնվում է Հայաստանի ծայր հյուսիս-արևելքում՝ Դեբեդի ստորին աջ ափին, այնտեղ, որտեղից գետը անցնում է Վրաստան, ապա՝ թեքվում դեպի Ադրբեջան և միանում Քռին:

Սա Հայաստանի Հանրապետության՝ ծովի մակերևույթից ամենացածր հատվածն է՝ 370 մետր: Դեբեդավանը սահմանակից է Վրաստանի Քվեմո Քարթլի երկրամասի Մառնեուլի շրջանի ադրբեջանաբնակ գյուղերին: Բնակչության թիվը 700-ի սահմաններում է:

Մինչև 1988 թվականի դեկտեմբեր գյուղում բնակվում էին ադրբեջանցիներ՝ բացի մի քանի ընտանիքներից: Ազգամիջյան դեպքերի պատճառով ադրբեջանցիները հեռացան, նրանց փոխարեն գյուղում հաստատվեցին Ադրբեջանից գաղթած հայեր, ինչպես նաև 11 ուդիներ:

Այսօր Դեբեդավանի բնակչության հիմնական մասը Վարդաշենի (այսօր՝ Օղուզ) շրջանի Ճալեթ հայկական գյուղի նախկին բնակիչներն են:

Ուդիները կովկասյան ժողովուրդ են, երկար դարեր հայերի կողքին ապրելով՝ դարձել են առաքելադավան և սովորել հայերեն:

Դեբեդավանը խորհրդային տարիներին կառուցված գյուղերից է: Տավուշի մարզի Նոյեմբերյանի շրջանում այսպիսի 4 բնակավայր կա՝ քաղաք Այրում, ինչպես նաև Դեղձավան, Պտղավան և Դեբեդավան գյուղեր:

Նախկինում Դեբեդավանը կազմում էր Լալվար սովխոզի գործարանի մի մասը և մտնում էր Բագրատաշեն գյուղի վարչական ենթակայության տակ: Դեբեդավան է վերանվանվել 1978-ին։

Դեբեդավանում ձմռան միջին ջերմաստիճանը 0 է, ձյուն հազվադեպ է տեղում: Այստեղ աճում է ձիթապտուղ, նուշ, նուռ, դեղձ, խաղող, արքայանարինջ, արևադարձային մշակաբույսեր:

Դեբեդավանի գինու գործարանը հումք է ընդունում Երևանի շամպայն գինիների գործարանի համար, այդ պատճառով այստեղ խաղողի մթերման դժվարություն չի լինում:

Վերջերս գյուղում «Իմ քայլը» հիմնադրամի հովանավորությամբ և համայնքի մասնակցությամբ կառուցվել է ժամանակակից մանկապարտեզ:

Գյուղի դպրոցում սովորում է ավելի քան 100 աշակերտ:

Source: https://www.civilnet.am/news/2020/05/07/Դեբեդավան-ամենացածրադիր-գոտու-հողը-և-մարդիկ/384019

This article contains text from a source with a copyright. Please help us by extracting the factual information and eliminating the rest in order to keep the site in accordance to fair use standards, or by obtaining permission for reuse on this site..